Dál beassá almmuhit Sámi girkobeivviide

Prográmmalávdegoddi gurut ravddas: Gun Aira (Ruoŧa girku Sámi ráđđi), Bierna Leine Bientie (Sámi girkoráđi Lullisámi searvegoddi), Birgitta Simma (SKKB), Tuomo Huusko (Oulu bismagoddi), Anne Dalheim (Sámi girkoráđđi), Sylvia Sparrok (Ruoŧa girku Sámi ráđđi) ja Tore Johnsen (Sámi girkoráđđi).

Dál sáhttá oastit festiválapássa Sámi girkobeivviide 2013. Ovttasbargoguoimmit olles Dávvikalohtas sávvet  buresboahtima sámi girkolaš stuorračoagganeapmái Muoffiei/Mo i Ranai borgemánu 9.-11.b.

Sámi girkobeaivvit leat riikkaidgaskasaš sámi girkofestivála. Doalut fátmmastit sámi girkoeallima Norggas, Ruoŧas, Suomas ja Ruoššas, ja dohko vurdojuvvojit lagabui 1000 oasseváldi. Ráhkkaneamit leat bures boahtán johtui ja prográmmalávdegoddi bovde iluin valljugas prográmmii mii fátmmasta viidát.

Viiddis prográma

Mis lea prográmma mii bovde vuoiŋŋalaš čiekŋudahttimii, hástala jurddašit, ja nanne iešdovddu ja oktavuođa rájáid badjel, dadjá prográmmalávdegotti ovdaolmmoš Anne Dalheim.  Váldofáddá «Bassi eanan! Bassi Sátni» bidjá sivdnádusoaskku, dálkkádatgažaldagaid ja álgoálbmogiid guovddážii. Girkobeaivvit fátmmastit viidát, das leat ee.  ipmilbálvalusat, seminárat, konsearttat, dáiddačájáhus, filmmat, teahter, nuoraidprográmma, mánáidprográmma ja vuovdinmárkanat.

Álgoálbmotbealli boktá beroštumi

Váikko sámi girkoeallin lea guovddážis, de leat girkobeaivvit rahpasat buohkaide, ja álgoálbmotbealli dahká ahte doalut leat beakkehan maiddái rikkaidgaskasaččat. Sámi girkoráđi váldočálli Tore Johnsen muitala ahte Lutheralaš máilmmelihtu guovllukantuvra Láhten-Ámerikkas lea váldán singuin oktauvođa. – Sii dadjet ahte dát leat girkolaš álgoálbmotdoalut main sii ge beroštit. Sin mielas váldofáddá lea áššáiguoskevaš ja árvvoštallet doaluide sáddet álgoálbmotáirasiid lutheralaš girkuin Láhten-Ámeriikkas, son muitala. Dát lea hirbmat movttiidahtti, ja čájeha ahte dát leat girkolaš doalut mat leat hui earenoamážat.

Almmuheapmi

Almmuheapmi dahkkojuvvo go oastá festiválapássa girkobeivviid neahttabáikkis, www.samiskekirkedager.no. Dás maiddái gávdnojit buot dárbbašlaš dieđut doaluid birra, prográmma, idjadeapmi jna.